ਗ਼ਜ਼ਲ - ਆਰ.ਬੀ.ਸੋਹਲ

Posted on:- 01-04-2016

ਪਿਆਰ   ਤੇਰੇ   ਨਾਲ   ਮੈਨੂੰ, ਬੇਪਨਾਹ   ਐ    ਜ਼ਿੰਦਗੀ ।
ਦੂਰ ਨਾ ਜਾ ਪਾਸ ਆ ਕੇ, ਗਲ ਲਗਾ ਐ ਜ਼ਿੰਦਗੀ ।

ਯਾਦ ਕਰ   ਉਂਗਲੀ ਫੜਾ ਕੇ, ਤੂੰ   ਸਿਖਾਇਆ ਤੋਰਨਾ,
ਹੁਣ   ਕਿਸੇ ਵੀ ਮੋੜ ਤੇ ਨਾ, ਹੱਥ ਛੁਡਾ ਐ ਜ਼ਿੰਦਗੀ ।

ਪਿਆਰ ਬੀਜਣ ਵਾਸਤੇ ਦਿਲ, ਨਾ ਕਦੇ ਬੰਜਰ   ਰਹੇ,
ਰਹਿਮ ਕਰ ਜਰਖੇਜ਼   ਇਸਨੂੰ, ਹੀ ਬਣਾ ਐ ਜ਼ਿੰਦਗੀ ।

ਹਰ ਪੜਾਅ ਤੇ ਮੰਜਿਲਾਂ ਦਾ , ਮੈਂ ਪਤਾ ਪੁੱਛਦਾ ਰਿਹਾ,
ਮਿਲ ਨਾ ਪਾਇਆ ਥੋਹ ਪਤਾ ਪਰ, ਤੂੰ ਵਿਖਾ ਐ ਜ਼ਿੰਦਗੀ ।

ਸੋਚਿਆ ਤੂੰ   ਜਿਸਮ ਦਾ ਹੀ, ਸਫਰ ਮੈਂ   ਕਰਦਾ ਰਹਾਂ,
ਬਣ ਨਾ ਤੂੰ ਅਨਭੋਲ ਐਵੇਂ, ਰੂਹ ਮਿਲਾ ਐ ਜ਼ਿੰਦਗੀ ।

ਕੌਲ ਸ਼ਿੱਦਤ   ਨਾਲ   ਸਾਰੇ, ਮੈਂ   ਨਿਭਾਉਂਦਾ ਹੀ ਰਿਹਾ,
ਆਪਣੇ   ਇਕਰਾਰ   ਪਰ ਤੂੰ, ਵੀ   ਨਿਭਾ ਐ ਜ਼ਿੰਦਗੀ ।

ਆਸ   ਦੇ   ਦੀਪਕ   ਨਿਰਾਸ਼ਾ, ਨਾ   ਬੁਝਾਵੇ ਹੁਣ ਕਦੇ,
ਬਣ ਕੇ ਹਰ ਦਿਨ ਤੂੰ ਦੀਵਾਲੀ,ਜਗਮਗਾ ਐ ਜ਼ਿੰਦਗੀ ।

ਸੋਚ ਹੁਣ ਬਸ ਗਮ ਹੀ ਮੇਰੇ, ਘਰ ਕਿਓਂ ਆਉਂਦੇ ਰਹੇ,
ਬਣ ਕੇ ਤੂੰ ਹਮਸਫਰ ਖੁਸ਼ੀਆਂ, ਵੀ ਲਿਆ ਐ ਜ਼ਿੰਦਗੀ ।

ਆਦਮੀ ‘ਚੋਂ ਚੇਤਨਾ ਦੀ, ਲਾਟ ਬੁਝਦੀ ਜਾ ਰਹੀ,
ਏਸ ਦੀਵੇ ਵਿਚ ਤੂੰ ਮੁੜ ਕੇ, ਤੇਲ ਪਾ ਐ ਜ਼ਿੰਦਗੀ ।

ਗ਼ਜ਼ਲ - ਆਰ.ਬੀ.ਸੋਹਲ

Posted on:- 01-04-2016

Comments

ਕਾਵਿ-ਸ਼ਾਰ

ਖ਼ਬਰਸਾਰ

ਕਾਵਿ-ਸ਼ਾਰ

ਕਿਤਾਬਾਂ

ਚਿੰਤਨ

ਕਾਤਰਾਂ

ਕਹਾਣੀ

ਐਡਵਰਟਾਈਜ਼ਮੈਂਟ

ਆਬ ਪਬਲੀਕੇਸ਼ਨਜ਼ ਵੱਲੋਂ ਪ੍ਰਕਾਸ਼ਿਤ ਪੁਸਤਕਾਂ